Illaa shan kun oo buugaag ah kuwaasi oo isagu jira Dugsiyada Hoose, Dhexe iyo Sare ayaa maanta ay maktabadda Qaranka Soomaaliyeed ku wareejisay ugu yaraan shan maktabadood oo ku kala yaala magaalooyin ay kamid yihiin Beled-weyne, Garoowe, Baydhabo, Guriceel iyo Luuq oo katirsan gobolka Gedo.
Munaasabada Wareejinta buugaagtan oo ka dhacday xarunta Akadeemiyada Cilmiga, Fanka, iyo Suugaanta Soomaaliyeed ahna hoyga faafinta hidaha iyo Dhaqanka Soomaaliyeed ayaa waxaa ka qayb galay mas’uuliyiinta Maktabadda Qaranka, Hormuudka Machadka Afka iyo Dhaqanka iyo bahda qalin leeyda oo ay ugu horreeyaan shanta maktabadood oo ku guulleystay in loogu deeqo buugaagtaas.
Agaasimaha Hormuudka Machadka Afka iyo Dhaqanka ee Akadeemiyada, Cilmiga, Fanka iyo Suugaanta Soomaaliyeed Prof Maxamed Cilmi oo hadal kajeediyay munaasabada ayaa kula dardaarmay mas’uuliyiinta maktabadaha magaalooyinka dalka inay muhiimad gaar ah siiyaan gudbinta fariimaha Akhriska iyo qoraalka waxaana uu ugu baaqay in ay nidaam casri ah u bedelaan maktabadaha si ay ula jaanqaadaan maktabadaha caalamka.
Maktabadaha kuyaala magaalooyinka dalka ayaa ka shaqeeya dhiirigelinta akhriska buugaagta cilmiga waxaana ka shaqeeya dhalinyaro aqoonyahanno ah oo gacan ka siiya dadka sidii lagu gaarsiin lahaa buugaagta aqoon darsiga iyo cilmiga.
Buugaagta la qaybiyay ayaa ka kooban buugaag ay ku qoran yihiin Siyaasadda, Dhaqaalaha, Suugaanta iyo Dhaqanka.
“Waxaan ku guuleysanay inaan kor kala socono maktabadaha iyo daruufaha ay ku shaqeeyaan si aan ugala shaqeyno dhammeeytirka baahiyaha ay qabaan” sidaasi waxaa yiri Maxamed Axmed Shiil oo ah Agaasimaha Maktabadda Qaranka.
Qeybinta buugaagtan oo ay ka soo shaqeysay Maktabadda Qaranka Soomaaliyeed iyadoo la kaashanaysa Maktabadda dalka Jordan ayaa waxaa ay qayb ka ah faafinta iyo dhiirigelinta Akhriska iyo qoraalka farta Soomaaliga howshaasi oo ay qeyb weyn ku leedahay Maktabadda Qarankeena Soomaaliyeed.
Maktabadda Qaranka oo ah keyd taariikhda dalka ayaa dib loo howlgeliyay sanadkii 2012-kii, iyadoo xarunteedii hore dib loogu dhisay barnaamijka isxilqaan oo ay dowladda Federaalka Soomaaliya ku dhawaaqday.
Waxaana jirta in dhowr jeer oo kala duwan ay u qeybisay buugaag muhiim ah oo ay ka faa’iideeysteen dugsiyo iyo jaamacado badan oo kuyaala gobollada dalkeena Soomaaliya.
Leave a Reply