Wasiirada Cadaaladda, Warfaafinta, Ganacsiga, Shaqada iyo Isgaarsiinta ee dowlad Goboleedka Koonfur Galbeed ayaa maanta booqday isbitaalka Baydhabo oo la dhigay dadkii ku dhaawacmay qaraxii Ismiidaaminta ee ka dhacay magaalada Baydhabo ee caasimadda KMG Koonfur Galbeed.
Wasiirada ayaa waxa ay mid mid u xog wareysteen dadka dhaawacyadu soo gaareen, si ay u qiimeeyaan xaaladahooda iyo nabarada soo gaaray inta ay gaarsiisantahay.
Sidoo kale waxay warbixino ka dhageysteen Agaasimaha Isbitaalka Baydhabo iyo Saraakiisha Caafimaadka, waxayna ka dalbadeen in deg-deg loogu soo gudbiyo hadii ay jiraan dhaawacyo Xaaladdooda Caafimaad aan waxba looga qaban karin magaalada Baydhabo.
Ugu danbeyntii Wasiirka Warfaafinta iyo Wacyigelinta Bulshada Koonfur Galbeed, mudane Ilyaas Saciid Cali (Qalinle) oo ku hadlay Afka Xukuumada iyo kan Madaxweynaha Koonfur Galbeed ayaa uga tacsiyadeeyay ehelada dadkii ku dhintay weerarkii maanta ka dhacay Baydhabo, isagoo caafimaad u rajeeyay intii dhaawacantay.
Inta la xaqiijiyay ilaa iyo hadda waxaa qaraxa maanta ka dhacay magaalada Baydhabo ku dhimatay 4 ruux, halka dhaawacana uu gaarsiisan yahay 9 qof.
Leave a Reply