Dowlada Soomaaliya oo cambaareysay afduubka jabuuti loogu gaystay fahad Yasiin

Laamaha Amniga dalka Jabuuti ayaa diyaaradii turkiga ee kasoo kicitintay dalka turkiga oo ay saarnaayeen la taliyihii Madaxwaynaha Soomaaliya Fahad Yaasiin iyo saraakiin kale oo la socotay waxay ku xanibeen Magaalada Jabuuti waxaana diyaaradii laga reebay Fahad yaasiin iyo saraakiishii la socotay.

Afhayeenka Madaxtooyada Soomaaliya ayaa cambaareeyey falka dowlada Jabuuti kula kacday La taliyaha amniga Madaxwaynaha iyo saraa kiisha kale.

Qoraalka kasoo abaxay afhayeenka ayaa sidaan u qornaa.

Dawladda Federaalka Soomaaliya waxa ay ka xuntahay falka xadgudubka ku ah xuquuqda musaafiriinta iyo shuruucda caalamiga ah ee Dawladda Jabuuti ay garoonka diyaaradaha Jabuuti ku xannibtay Lataliyaha Amniga Qaranka ee Madaxweynaha JFS Mudane Fahad Yaasiin Xaaji Daahir iyo Saraakiisha Soomaaliyeed ee wehelisa.

Waxaan u sheegeynaa Dowladda Jabuuti in ay masuuliyiintaas u fududeyso safarkooda, sidoo kale ay masuul buuxda katahay wixii dhibaato ah oo soo gaara amnigooda shakhsiga ah, anaga oo ka xun faragalintan qaawan ee xadgudubka ku ah labada dawladood iyo labada shacab ee walaalaha ah.

Lataliyaha Amniga Qaranka ee Madaxweynaha JFS Mudane Fahad Yaasiin wuxa uu ka qayb galayaa shirka Amniga Qaranka oo barri oo ay taariikhdu tahay 18-ka Sebteembar, 2021 lagu qaban doono magaalada Muqdisho.

DHAMMAAD

Cabdirashiid Maxamed Xaashi,Agaasimaha Warfaafinta & Xiriirka Warbaahinta, Madaxtooyada Jamhuuriyadda Federaalka Soomaaliya