Magaalada Beledweyne ee xarunta gobolka Hiiraan waxaa maanta la geeyey qalabka loogu tala galay qabashada doorashooyinka dalka, xilli lagu wado in magaaladaas lagu qabto doorashada qaar ka mid ah kuraasta golaha shacabka ee deegaan doorashadoodu tahay HirShabeelle.
Duqa magaalada Beladweyne Nadar Tabaax Maalin iyo saraakiisha ciidamada ammaanka ee magaalada Beledweyne xubnihii waday qalabkaas kala wareegay.
Marwo Nadar Maalin oo goobtii ay kula wareegeen qalabkaas warbaahinta kula hadashay ayaa tilmaantay muhiimada ay leedahay in kuraasta xildhibaanada golaha shacabka doorashadoodu ay ka dhacdo magaalada Beledweyne.
Nadar ayaa sidoo kale ugu baaqday shacabka reer Hiiraan inay ka shaqeeyaan nabadda iyo sidii loo soo dhaweyn lahaa dadka qeyb gelaya doorashada lagu qaban doono magaalada Beledweyne.
Maalmaha soo socda waxaa lagu wadaa in doorashooyinka xildhibaanada golaha shacabka ay ka bilaawdaan magaalooyinka dowlad goboleedyada dalka, waxaana todobaadkaan gudihiisa Muqdisho lagu qabanayaa doorashada 9-kursi oo deegaan doorashadoodu tahay gobollada waqooyi ee dalka.
Leave a Reply