Munaasabad lagu daah furayo masraxa hal abuurka oo loogu talagalay in abwaanada iyo aqoonyahanada ay ku soo bandhigaan sugaan iyo doodo cilmiyeysan ayaa caawa laga hirgeliyay gudaha xarunta Wasaaradda Warfaafinta, dhaqanka iyo Dalxiiska ee Xukuumadda Soomaaliya.
Wasiirka Warfaafinta ee Xukuumadda Soomaaliya Mudane Maxamed Cabdi Xayir Maareeye iyo Wasiirka Maaliyadda Dr Cabdiraxmaan Ducaale Beyle ayaa caawa si wada jir ah xariga uga jaray masraxa furan, kaasi oo wixii hadda ka dambeeya lagu qaban doono doodo iyo in bulshada loogu soo bandhigo xogta dowladda iyo horumarka ay ku talaabsatay.
Wasiir Maareeya oo hadalkooban ka jeediyay madasha ayaa sheegay in masraxa furan lagu soo bandhigi doono wax badan oo bulshada Soomaaliyeed wax u tara.
“Caawa waxaa halkan sharaf noo ah aniga iyo Wasiirka Maaliyada inaan furno masraxa furan oo ay dhistay Wasaaradda, halkan waxaa lagu qaban doonaan wax badan oo bulshada wax u tarta, madaxda sare ee dalka ayaa halkan imaanaya oo bulshada la hadlaya, oo sida caawa Warbaahinta u joogto ay awood u heli doonaan inay su’aalo ku weydiin karaan madaxdooda, Wasiirada waxa ay u imaan doonaan koox koox” ayuu yiri Wasiir Maareeye.
Wasiirka Warfaafinta, Dhaqanka iyo dalxiiska ee Xukuumadda Soomaaliya Mudane Maxamed Cabdi Xayir Maareeya ayaa hoosta ka xariiqay in Warbaahinta Qaranka iyo Warbaahinta sida gaarka ah loo leeyahay ay masraxa furan si wadajir ah ugu qaban doonaan doodo.
“Dood cilmiyeedyo ayaa halkan lagu qaban doonaa, gaar ahaan arrinta badda oo aan keeni doono qabiiro dhanka badda ah, waxaan kaloo keeni doonaa arrimaha bulshada dad kala hadla, oo dood ku geli doono, si wada jir ah waxaa dood ugu qaban doono Warbaahinta Qaranka iyo Warbaahinta sida gaarka ah loo leeyahay ayay halkan u furan tahay habeen iyo Maalin”.ayuu hadalkiisa ku daray Wasiirka Warfaafinta.
Wasiir Maareeye ayaa daboolka ka qaaday in Golaha Murtida iyo Maddadaalada ee Tiyaatarta Qaranka xariga laga jari doono bisha Janaayo ee sanadka cusub, isagoo xusay in dhismaha masraxa hal abuurka ay gacan ka geysatay dhismaheeda Maareeyaha Wakaaladda dhismaha Qaranka.
“Masraxa furan qofkasta waa u furanyahay oo wax u sheegaya bulshadiisa, masraxa furan maamul gaar ah ayuu leeyahay waad imaan kartaan oo waad ku soo bandhigi kartaan xirfadiina iyo aqoontiina, Wakaaladda Horumarinta Dhismaha Soomaaliyeed ayaa gacan nagu siisay dhismaha masraxa furan, iskaa wax u qabso ayaana ku dhisnay runtii waan u mahadcelinayaa Sareeyo Guud Bashiir Maxamed Jaamac” ayuu Wasiirka hadalkiisa ku soo xiray.
Wasiirka Maaliyadda ee Xukuumadda Federaalka Soomaaliya Dr Cabdiraxmaan Ducaale Beyle oo isna xafladda ka hadlay ayaa sheegay in wax badan la qabsan karo, masraxa ay Wasaaradda Warfaafinta hirgelisayna ay qeyb ka tahay horumarka iyo bilicda ka jirta magaalada.
“Wasiirka oo ah nin aftahana ayaa wax waliba sheegay oo soo koobay, masraxa aadka u quruxda badan waxa uu ka midyahay waxyaabaha qurxoon ee maalin kasta la furo, runtii halkan waa meesha wax la isugu sheegi karo., waxa ay fududeyneysa in aragtiyo la isku weeydaarsado, dhismaha waan kaala qeyb galeynaa runtii sida aan ugala qeyb qaadano dhismaha xarumaha Wasaaradaha kale.” Ayuu yiri Wasiir Beyle.
Munaasadda lagu daah furayay masraxa hal abuurka ayaa waxaa ka qeyb galay Wasiiro, Xildhibaanno ka tirsan labada Gole ee Aqalka sare iyo Golaha Shacabka, Maareeyaha Guud Wakaaladda Dhismaha Qaranka, Agaasimaha Guud ee hay’adda Socdaalka, Agaasimaha Guud ee Wasaaradda Warfaafinta, Dhaqanka iyo Dalxiiska ee Xukuumadda Soomaaliya, Agaasimaha Radio Muqdisho iyo qaar kale oo ka mid ah Agaasime Waaxeedyada Wasaaradda Warfaafinta, marti sharaf iyo fanaaniinta Hobollada Qaranka, kuwaasi oo madasha ku soo bandhigay suugaan ka tarjumeyso horumarka ay dowladda ku talaabsatay iyo baraarujin ku saabsan inay ka qeyb qaataan horumarinta dalka.
Leave a Reply