Maamulka Deni oo war kasoo Saaray xiisadda Boosaaso

War-qoraal kasoo baxay Madaxtooyada Puntland ayaa looga hadlay dagaalka ka socda Magaalada Magaalada Boosaaso xarunta Gobolka Bari kaas oo sababay qasaaro isugu jira dhimasho, dhaawac iyo barakicin.

Warka kasoo baxay Madaxtooyada Puntland ayaa sidaan u qornaa.

Dowladda Puntland ee Soomaaliyeed waxaa mar wal ba ka go’an illaalinta dowladnimada ku dhisan sareynta sharciga. Dowladda Puntland waxay caddeynaysaa in Agaasimihii hore ee PSF uu hurinayo colaad ka dhacda Magaalada Boosaaso, asagoo si aan kala sooc lahayn Magaalada ugu duqeynaya hoobiyaal ka mid ah hantida PSF ee laga sugayo inuu xilkeeda wareejiyo.

Haddaba, si loo dhiirigeliyo sidii xal nabadeed loogu dhammeyn lahaa xaaladda xil wareejinta masuuliyadda iyo hantida PSF, Dowladda Puntland waxay ku celinaysaa in ay wakhti siinayso dadaalada loogu jiro in si nabad ah lagu dhammeeyo xaaladda Boosaaso, Dowladduna waxay qaadaysaa wixii tillaabooyin lagu fududeynayo dadaalada socda.